Портрет: 

Bilâl Mambet 1935 senesi fevral 2-de Sudaq rayonınıñ Qoz köyünde doğdı. Sürgünlikte Samarqand oblastı Kattaqurğan rayonına tüşe. Orta mektepni bitirgen soñ Samarqand ticaret institutına kire ve onı 1959 senesi bitire. Cemaat aşı boyunca injener-tehnolog diplomını ala. Çırçıq, Taşkent şeerlerinde çalışa. 1964 senesi "Lenin bayrağı" gazetasına işke davet etile. Ta mektep çağında şiirler yazıp başlağan Bilâl "Lenin bayrağı"nıñ faal habercilerinden ve müelliflerinden biri ola.

            Bilâl Mambet devirniñ mahsuldar icatkârlarından biri olaraq altmışıncı yıllarda meydanğa çıqtı ve çoqqa barmay o balalar şairi olaraq tanıldı. Onıñ bu devirde yaratılğan "Yağmur" (1970), "Papiy gölü" (1971, özbek tilinde), "Anamnıñ türküsi" (1973), "Baar nağmeleri" (1975), "Tılsımlı sandıq" (1978), "Medihanıñ tayçığı" (1978, özbek tilinde), "Töpemizde küneş" (1981), "Yapraq üstünde tamçılar" (1984) adlı cıyıntıqlarına oquyıcılar isteknen qarşılap aldılar.

            Bilâl Mambet em büyükler, em balalar içün yaza. Amma, balalar içün çoqça yaza. Onıñ balalarğa bağışlanılğan şiirleri tegiz, sade,  meraqlı olmaqnen bir sırada, balalar psihologiyasını bilip, olarnıñ yaş hususiyetlerini ağlap yazılğanlar. Şair ayat adiselerini balalar tilinen añlatmağa, yañılıqnıñ eskiliknen küreşini real barışıqnı qorçalav, yahşı oquv, añlı ve intizamlı olmaq kibi çizgilerni terbiyelemege hızmet ete.

            Bilâl Mambet halqlarnıñ inqilâbdan evelki ağır yaşayışı, baylarnen fuqareler arasındaki zıddiyetler, o zamandaki aqsızlıqlar aqqında bir çoq şiirler, masallar, efsaneler yazdı.  Onıñ "Seithalil" balladasındaki adiy köy balası iñkilâbiy ruhlu adamlarnen körüşken ve qonuşqan soñ, aqsızlıqqa qarşı faal küreşicilerniñ birine çevrile. Bilâl Mambetniñ kitapları saifelerinden insaniyetlik, adaletlilik, namus ve ahlâqlılıq sesi eşitile.

            Nemse-faşist okkupatsiyasınıñ bütün deşetlerini büyüklernen bir sırada körip-keçirgen şair cenk faciaları, barışıq eşqına küreşniñ muqaddesligi aqqında balalar içün bir sıra eyecanlandırıcı eserler yazdı.

            Bilâl Mambet özü yaratqan masallarda, efsanelerde, şiirlerde balalarğa yañılıq berecek, olarnıñ fikirlerini zenginleştirecek, terbiyesineye müsbet tesir kösterecek meselelerni kötere. Onıñ eserlerinde dostluq, vatanperverlik kibi nağmeler ög sırada turalar. Şair atalar sözlerinden, ikmetli ibarelerden semereli faydalanaraq, balalarnıñ yüreklerine toqunacaq, hayallarını uyantacaq kibi bediylikke irişe.

            Balalarnıñ ayat aqqındaki tasavurlarını kenişletüvde çeşit tapmacalarnıñ da emiyeti büyüktir. Bilâlnıñ kitaplarına kirgen tapmacalarnıñ poetik forması da, mündericesi de bayağı mükemmel. Bizim halqımıznıñ ağız yaratıcılığı hazinesinde pek çoq masalar, efsaneler, destanlar, aytımlar bar. Olarnıñ bazıları vaqıtnıñ keçüvinen unutıldı, bazıları eskirdi, bazıları ise, şimdiki künniñ közünen baqılacaq olsa, pek  sadeleşti. Olarnı toplamaq, yañıdan yazıp çıqmaq, halq ağız yaratıcılığınıñ ğayıp olıp keteyatqan eserlerini tiklemek er bir icatkârnıñ muqaddes borcudır. Bu sada Bilâl Mambet taqlitke layıq işler yapıp keldi. O, halq eserleriniñ şekilini ve ruhunı saqlap qalğan alda, onıñ mündericesine zemane ruhunı siñdirerek, oldıqça añartıp balalarğa teklif ete.

            Şair 1990 senesi vatanğa qaytıp keldi ve yañı teşkil etilgen "Dostluq" gazetasında çalışıp başladı. 1995 senesi hastalıq sebebinden işten ketmege mecbur oldı. 1996 senesi onıñ balalar içün efsanelerden, tezaytımlardan, tampacalardan ibaret "Qoz efsanesi" adlı kitabı çıqtı. O SSSR yazıcıları birliginiñ azası edi, şimdi Ukraina yazıcıları milliy birliginiñ azasıdır, Aqmescitte yaşay.

                                                           Fazıl R., Nagayev S. Qırımtatar edebiyatınıñ tarihı. – Aqmescit, 2001. – S.518-520