Gülsum apteniñ arhivi özüniñ tedqiqatçılarını bekley

pic: 

İ.Gasprinskiy adında qırımtatar kütüphanesiniñ elyazma ve arhiv bölüginiñ hadimleri Elvira hanım Mihalevağa  milliy areketimizniñ faal iştirakçisi tarih ilimleri namzeti Gülsum apte Mihalevanıñ  arhivını kütüphanege teslim  etkeni içün teşekkürlerini bildireler.

Gülsum apte Mihaleva (1927-2006) bütün añlı ömürini halqımıznıñ acınıqlı tarihını ögrenüvge, bu aqta yazuvğa bağışlağan tarihşınas, milliy areketimizniñ faal iştirakçilerinden biri edi.

Gülsum  Aliyevna Mihaleva 1927 senesi mayıs 9-da Aqmescit şeerinde dünyağa keldi. 1955 senesi Samarqand devlet universitetiniñ tarih fakultetini yekünley. Gülsum apteniñ arhivinde "Rusiyeniñ Orta Aziya halqlarınen ticaret ve diplomatik alâqaları aqqında" dissertatsiyasına toplağan materiallar saqlanğan.

60-nci yıllarda Gülsum apte milliy areketke qoşula. Ve şu vaqıttan başlap ilmiy eserleri basılmadı, doktorlıq dissertatsiyaları qorçalanuvğa taqdim etilmedi.

Ve   arhivniñ qıymetli qısmını üzbek tilinde neşir olunğan "Qırımtatarlarnıñ Ulu Vatan cenkindeki iştirağı" ve umumen dünya yüzü körmegen "50 yıl (1944-1994) sürgünlikte" monografiyalarınıñ elyazmaları teşkil ete.

Gülsum apteniñ arhivi özüniñ tedqiqatçılarını bekley.